Gema Sriwijaya www.gemasonline.net
Related Articles
Laporan : Dedi S
GEMAS – MUARA ENIM
Betepatan ngak moment taun baru Islam, mangke di bulan Muharam ni ade bebeghape dusun nye masih menjunjung tinggi budaya leluhur isan di nenek moyangnye, di antarenye Dusun Muara Lawai, Kecamatan Muara Enim, Kabupaten Muara Enim, misalnye. Tekinak masyarakat dusun ini reramian masak lemak seghempak, ndik memperingati taun baru Islam sekaligus melakukan berbagai ritual adat yang ditghunkah li kepuyangan (Zaman nenek moyang) di aghi Sabtu (23/09/18) malam Minggu ni.
“Melemang” itulah sebutan yang melekat di masyarakat dusun ini. Lemang dibuat isan di beghas ketan dicampur pati niugh (Kelapa), dem tu dimasak dengan care dighebus dalam ghuas buloh (Bambu) mude yang panjangnye kire-kire 40 sampai 50 centimeter. Buloh beghisi beghas ketan ngak ayik santan tu tadi, ditaing di pucuk baghe api, kekire dek lame ige, lemang tu masak.
Tekinak di dusun itu, ampir tiap ghumah warge melaksanekah tradisi tughun temughun ini. Bukan itu bae, warge isak di dusun lain pule banyak ye bedatamgan ke dusun Muare Lawai ni, ndak nyaksikah semaraknye kegiatan adat budaya dusun ini, sambil ngecap lemang nye ditengahkah li tuan ghumah.
Junaidi (60) salah sughang petue (Tokoh masyarakat) dusun ini, ngakok bangga dengan adenye adat melemang yang masih kental melekat di masyarakat dusun die ni.
“Nggok niah, budaye ini satu kebanggaan warge dan dusun kami ini. Nye pastinya, merapatkah hubungan silahturahmi serte kekeluargean, khususnye ngak tetangge kidau-kanan,” ujinye.
Budaye melemang ini, dekde pule luput isak diperhatian bujang-gadis dusun ini. Malahan ade nye ngatekah, kegiatan lok ini adelah satu moment yang ilok. Sebab dengan adenye budaya melemamg ini, bujang-gadis pacak becerite saling tukar fikiran sesame die ngak jeme tue sang gadis yang diribanginye, sambil nikmati acara makan besame keluarge. Baik itu di ghumah bujangnye, atau pun gadisannye.
Bowo, bujang isak di Muara Enim, yang mak ini aghi dang merajut asmara ngan gadis idamannye di dusun Muara Lawai ni, nceritekah, budaye melemang ni adelah satu kesempatan bagi die ndak lebih mengakrabkah hubungan die ngan jeme tue gadisan yang diribanginye.
“Sambil makan ketan lemang, kami pacak ngubrol ngak calon mentue tu”, kate die sambil nggerawe.
Lain pule ngak akok’an Deki, budak ini ngicekkah ribang nian ketike lah udem acara sanje isan di ghumah ke ghuma. Setiap warge di tiap ghumah tu, ade nye menyisihkah seghuas sampai 2 ghuas lemang ndek dienjukkah ke ghumah ketue adat Muare Lawai.
“Inilah yang bekesan nian, jadi adat di sini memang masih idop nian”, uji Deki.
Usin (40), keturunan generasi penerus ketue adat, Raden (almarhum), ketike lah udem gegale warge ngantatkah lemang ke ghumahnye, die nceritekah awal muke tradisi melemang ini sampai membudaye di dusun ini.
“Ngape warisan leluhur warge Muare Lawai yang masih dihormati sampai mak ini, dengan care memasak lemang. Sebab dulu ade sesosok lanang sakti mandra gune, yang ditakuti dan disegani warge. Die adelah Cilianum (Puyang) nye banyak kemampuan dan punye banyak pusake yang masih terawat sampai mak ini aghi”, cerite Usin.
Semangat warge ngikuti acara adat ni laju mbuat jalan di duaun itu agak macet dikit. Karne banyak kenderaan nye parkir di pinggir jalan agung.
“Nak makmane kina, kami masih kah ngikuti acara adat ni. Pegilah mpok kulit buloh bekepaan di paghak ghumah ni”, kate Hamiril, nye di paghak humahnye banyak mubil parkir.
Warge beaghap, momen lok ini dijadikah pembelajaran ulndek gegalenye. Khususnye menghargei budaye dan mempererat silahturahmi keluarge dan tetangge.
Menurut Agus, salah sughang pengunjung budaye dusun ini ngatekah, die sangat mengapresiasi acara adat ni
“Aku sangat apresiasi acara adat warge Muara Lawai, apelagi kami diajak nikmati acara adat ini. Malahan makanan ngak minuman yang ditengahkah ini, pacak mbuat pengunjung ngasekah lemaknye rase masa’an lemang warge”, ji Agus.
Editor : Ivi Hamzah
